२०८० चैत १६ गते शुक्रबार
ट्रेन्डिङ

बैतडीमा तीन वर्षमा १३० नवजात शिशुको मृत्यु

SansherOnline SansherOnline
शुक्रबार ०५, फागुन २०७९ ०२:४९
बैतडीमा तीन वर्षमा १३० नवजात शिशुको मृत्यु

 

बैतडी : बैतडीमा तीन वर्षमा एक सय ३० नवजात शिशुको मृत्यु भएको छ। जिल्ला स्वास्थ्य कार्यालयका अनुसार आर्थिक वर्ष २०७६/७७ देखि आव २०७८/७९ सम्म शिशुको मृत्यु भएको हो। यहाँ हरेक वर्ष नवजात शिशु मृत्युदर बढ्दै गएको स्वास्थ्य कार्यालयका प्रमुख योगेशप्रसाद भट्टले बताए।

आव २०७६/७७ मा ३१, आव २०७७/७८ मा ४८ नवजात शिशुको मृत्यु भएको थियो। गत आवमा ५१ नवजात शिशुको मृत्यु भएको उनले जानकारी दिए।  गत आर्थिक वर्षमा सबैभन्दा बढी पुर्चौंडी नगरपालिकामा १३ नवजात शिशुको मृत्यु भएको थियो।

यस्तै मेलौली नगरपालिकामा ११, सिगास गाउँपालिकामा ६, दशरथचन्द र पाटन नगरपालिकामा ५÷५, डिलाशैनी र शिवनाथ गाउँपालिकामा ४÷४ तथा सुर्नया गाउँपालिकामा दुई नवजात शिशुको मृत्यु भएको छ।

स्वास्थ्य संस्थामा दक्ष प्रसूतिकर्मी नहुनु, सुत्केरी हुन स्वास्थ्य संस्था नजानुलगायत कारणले नवजात शिशुको मृत्यु हुने गरेको छ। समय अगावै जन्मिनु, नवजात शिशुमा सङ्क्रमण हुनु र निस्सासिएर पनि शिशुको मृत्यु हुने गरेको स्वास्थ्य प्रमुख भट्टले बताए।

जिल्लामा एक सय ३० सुरक्षित प्रसूति सेवा केन्द्र सञ्चालनमा छन्। नवजात शिशुको मृत्यु रोकथामका लागि स्थानीय तहले विशेष कार्यक्रम सञ्चालन गर्नुपर्नेमा सरोकारवालाको जोड छ। स्वास्थ्यका सम्पूर्ण अधिकार स्थानीय तहमा रहेका भए पनि स्थानीय तहले स्वास्थ्य क्षेत्रलाई प्राथमिकतामा नराख्दा विभिन्न समस्या देखिन थालेका छन्।–रासस

प्रतिक्रिया