सन्शेर अनलाइन
बैतडी । दशरथचन्द नगरपालिकाले उज्यालो नगरपालिका अभियान सुरू गरेको छ । नगरपालिकाभित्रका मुख्य बजार, सार्वजनिक स्थान तथा मन्दिरहरुमा बत्ती बाल्ने अभियानको शुभारम्भ गरिएको हो ।
नेपाल विद्युत प्राधिकरण बैतडी वितरण केन्द्रको प्राविधिक सहयोगमा आइतबार नगरपालिकाले गोठलापानी, गढी र शाहीलेक बजारमा ७२ वटा बल्ब जडान गरी नियमित बत्ती बाल्ने अभियान सुरु गरेको हो ।
देहिमाण्डौं, मुस्याचौर, जुलाघाटलगायतका बजार र सार्वजनिक स्थानमा पनि क्रमश: बत्ती बाल्ने योजना रहेको नगरप्रमुख पुस्करराज जोशी (लख्खाभाइ) ले बताउनुभयो । दशरथचन्द नगरपालिकाको नीति र कार्यक्रम अनुसार अभियान सुरु गरिएको र उक्त अभियानले नगरपालिका भित्रका सबै सार्वजनिक स्थानलाई समेट्ने उहाँले बनाउनुभयाे ।
विद्युत लाइन नपुगेका सार्वजनिक स्थानमा सौर्य बत्ती जडान गरिने उहाँले बताउनुभयो । बत्तीले बजार तथा सार्वजनिक स्थानहरुको सुन्दरता एवं सुरक्षामा पनि सहयोग पुग्ने विश्वास गरिएको छ । गाेठलापानीमा रहेकाे विद्युत कार्यालयमा राखिएको स्वीचले गोठलापानी बजार र गढी र शाहिलेकका लागि अलग–अलग स्वीच राखिएका छन् ।
प्रतिक्रिया