SansherOnline
बैतडी : भूमि समस्या समाधान आयोग जिल्ला समिति बैतडीले पूर्णता पाएको छ। मंगलबार महिला सदस्यका रूपमा सरस्वती जोशीको नियुक्तिसँगै अपूर्ण रहेको समिति अब पूर्ण रूपमा क्रियाशील भएको हो।
आयोगका अध्यक्ष रमेशदत्त पाण्डेयले जोशीलाई शपथग्रहण गराउँदै औपचारिक रूपमा नियुक्ति दिएका थिए । समिति पूर्णतापछि भूमिहीन दलित भूमिहीन सुकुम्बासी तथा अव्यवस्थित रूपमा बसोबास गरिरहेका विपन्न नागरिकका समस्या समाधानमा सक्रिय रूपमा लाग्ने बताइएको छ ।
अध्यक्ष पाण्डेयका अनुसार अब सिंगो समिति एकढिक्का भएर भूमिहीनहरूको समस्या समाधानमा काम गर्नेछ । उनले सबै स्थानीय तह र सरोकारवालाहरूको सहयोग आवश्यक पर्ने बताउँदै सम्बन्धित निकायहरूसँग समन्वय गर्ने प्रतिबद्धता व्यक्त गरे । समितिले अब आफ्ना कार्यक्रमहरू तीव्र रूपमा अघि बढाउने योजना बनाएको छ । भूमिहीन सुकुम्बासीलाई जग्गा वितरण गर्न पहल गरिने बताउँदै अध्यक्ष पाण्डेयले स्थानीय तहहरूसँग छलफल भइरहेको जानकारी दिए । भूमि समस्या समाधान आयोग जिल्ला समिति बैतडीमा विभिन्न दलहरूको प्रतिनिधित्व छ ।
नेपाली कांग्रेसको कोटाबाट अध्यक्षमा रमेशदत्त पाण्डेय नियुक्त भएका थिए भने महिला सदस्यका रूपमा पाटन नगरपालिकाकी सरस्वती जोशीले स्थान पाएकी छिन्। त्यस्तै, नेकपा एमालेको कोटाबाट विज्ञ सदस्यमा जगदीशसिंह नायक र सदस्यमा जानकी अवस्थी रहेका छन् । यसैबीच भूमि समस्या समाधान आयोग जिल्ला समिति बैतडीका कर्मचारीका रूपमा विभागबाट करारमा आएका सर्भेक्षकसहित पाँच जना प्राविधिक कर्मचारीलाई पनि स्वागत गरिएको छ ।
आयोगका सदस्य सचिव एवं नापी कार्यालय बैतडीका प्रमुख रणसिंह रावलका अनुसार ती कर्मचारीहरूले अब आयोगका कामलाई अघि बढाउन सहयोग गर्नेछन् । समितिले पूर्णता पाएसँगै जिल्लाका भूमिहीन सुकुम्बासी तथा अव्यवस्थित रूपमा बसोबास गरिरहेका नागरिकका लागि राहतको आशा बढेको छ । अब आयोगले ती नागरिकलाई जग्गा उपलब्ध गराउने प्रक्रिया छिट्टै अघि बढाउने प्रतिबद्धता जनाएको छ ।
प्रतिक्रिया