SansherOnline
बैतडी : बैतडीको गोकुलेश्वरस्थित सेटीगाउँ बहुमुखी क्याम्पसमा अनेरास्ववियुले तालाबन्दी गरेको छ। चैत ५ गते हुने स्वतन्त्र विद्यार्थी युनियन (स्ववियू) निर्वाचनका लागि क्याम्पस प्रशासनले फर्जी विद्यार्थी भर्ना गरेको र सहमति विपरित नेबिसंघ तथा क्रान्तिकारीलाई मात्र परिचयपत्र वितरण गरेको आरोप अनेरास्ववियुले लगाएको छ।
अनेरास्ववियु सह-इन्चार्ज एवं एमाले जिल्ला कमिटी सदस्य नरेन्द्र नाथका अनुसार, क्याम्पसमा विद्यार्थी भर्नाको समयसीमा सकिएको १० दिनपछि फर्जी विद्यार्थी भर्ना गरिएको छ। मतदाता सूचीअनुसार परिचयपत्र वितरण गर्नुपर्ने माग क्याम्पस प्रशासनले अस्वीकार गरेको तथा नेबिसंघ र क्रान्तिकारीलाई मात्र एकमुष्ट रूपमा परिचयपत्र उपलब्ध गराएको भन्दै तालाबन्दी गरिएको हो।
अनेरास्ववियुले फर्जी विद्यार्थी भर्ना खारेज गर्न, जबरजस्ती वितरण गरिएका परिचयपत्र फिर्ता ल्याई वास्तविक विद्यार्थीलाई वितरण गर्नुपर्ने माग राख्दै आन्दोलन जारी राखेको जनाएको छ। क्याम्पस प्रशासनले भने यस विषयमा कुनै आधिकारिक धारणा सार्वजनिक गरेको छैन। स्ववियू निर्वाचनको मिति नजिकिँदै गर्दा विद्यार्थी संगठनहरूबीच बढ्दो असन्तुष्टिले चुनावी प्रक्रियामा असर पर्ने सम्भावना देखिएको छ।
प्रतिक्रिया