सन्शेर अनलाइन
बैतडी । सुदूरपश्चिम प्रदेशमा मनाइने गौरापर्वको मुख्य दिन आज दुर्वाष्टमी अर्थात् अठ्यावाली मनाइँदैछ।
शनिबार साँझ गौराघरमा भित्रयाएकी गौरादेवीलाई आज ब्रतालु महिलाले गौरा मन्दिरको गौरा खलामा लगेर पूजा गर्ने चलन छ।
ब्रतालु महिलाले बिरुडाले दिनभरि फाग गाएर गौरादेवीको पूजा गर्ने गरेका छन्। हिजो गौरादेवीमा चढाएको दुबधागो (बिशेष किसिमकाे धागो) पनि आजै महिलाहरूले धारण गर्ने गर्दछन्। ब्रथबन्ध गरेका पुरुषले जनै धारण गरेजस्तै यहाँका बिबाहित महिलाले दुबधागो धारण गर्ने गर्दछन्।
गौरा घरबाट गौरालाई सिङ्गारेर गौराखलामा लगेर महिलाले सामूहिक अठ्यावाली गाउँदै पूजा गर्ने चलन छ। गौराको उत्पत्ति, महेश्वरसँगको विवाहलगायत प्रसङ्ग फागमार्फत नै भन्ने गरेका छन्।
गौराको पूजन गरिसकेपछि मुख्य प्रसादका रूपमा रहेको बिरुडाले श्रीमान्, छोराछोरी र आफन्तजनको दीर्घायुको कामना गर्दै पुज्ने गर्दछन्।
महिलाले गाैराकाे पूजा सकेपछि पुरुषहरूले ठाडोखेल, ढुस्को धमारीलगायत ऐतिहासिक संस्कृतिमा आधारित खेलहरू खेल्ने गर्दछन्। सुदूरपश्चिमेलीहरूले दसैँभन्दा पनि बढी महत्वका साथ यस पर्वलाई मनाउने गरेका छन् । त्यसैले गौरामा परदेशिएकाहरू पनि घर फर्किने गरेका छन्। गौरामा विवाहित चेलीहरू पनि माइत आउने चलन छ।
गौरापर्वकै अवसरमा सुदूरपश्चिम प्रदेशमा आइतबार र सोमवार सार्वजनिक बिदा दिइएको छ। सरकारले आइतवार भदौ १५ र प्रदेश सरकारले भदौ १६ गते सोमबार गौरापर्वको बिदा दिएपछि सुदूरपश्चिममा दुई दिन सार्वजनिक बिदा कायम भएको हो।
प्रतिक्रिया