SansherOnline
बैतडी : बैतडीको सिगास गाउँपालिका वडा नं. ९ चौखाममा जात्रा मनाइने भएको छ । सिगास धाम चौखाम मन्दिरमा यस वर्ष पहिलो पर्व असोज शुक्ल अष्टमीको दिन जाँत हुने भएको हो ।
आज देखि मन्दिरमा विधिवत् रूपमा पूजा शुभारम्भ भएको र २४ गते सिगास धाम चौखाम मन्दिरमा जाँत हुने मन्दिरका पुजारी चन्द्रदेब अवस्थीले जानकारी दिनुभयो । पूजाआजा सहित दर्शन गरेमा मनोकामना पूरा हुने जनविश्वास रहिआएको छ । उक्त जाँत हेर्न छिमेकी जिल्ला बझाङ, डडेलधुरा, डोटी सहित तराइका जिल्लाबाट समेत श्रदालु भक्तजन आउने गरेका छन् ।
देउरो
जाँतको मुख्य आकर्षक देउरो हो । सामान्यतया देवपूजाका सामग्री वीर योद्धाका आयुध जो देवता तथा देव गणले प्रयोगमा ल्याउँथे ती सबै देव सामग्री (भाणिकुणी), धाजा नेजा, बाजागाजासहित जयजयकार गर्दै देउता धामीले नेतृत्व लिएर भडारघरबाट देवालय पुयाउने झाँकी हो देउरो ।
गाउँका सबै मानिस (भणार) देउघरमा जम्मा हुन्छन् । बाजा बजाउनेहरूले विभिन्न प्रकार बाजा बजाउने, जिम्मेवारी तोकिएअनुसारका कार्य गर्नेले आआफ्नो भूमिका निर्वाह गर्छन् ।
पूजा
जाँतको बाहिरी चहल–पहलसँगै देव पूजन पनि मुख्य हो । मन्दिर परिसरमा प्रवेशसँगै जल, धुप, दीप, ऋतुफल फूल आदि चढाएर दर्शन गर्दछन् ।
देउडा, फाग
जाँत देव पूजनसँगै मनोरञ्जन राम रमाइलो पनि हो । रमाइलो मनोरञ्जनका लागि देउडा खेल्दछन् । डोटेली समाजको विशिष्ट संस्कृति हो देउडा (दिउणी) देउडामा दोहोरी चल्छ । रातभर पनि खेल्ने गरिन्छ । विभिन्न बस्ती–बस्तीबाट आएका जतेरुले गीतमा नयाँ भाखा ल्याइएका हुन्छन् । देउडा महिला, पुरुष छुट्टा–छुट्टै खेल्छन् ।
भेटघाट तथा सद्भाव
जाँतलाई टाढा–टाढा बस्ने आफन्तसँग भेटको अवसरका रूपमा पनि मान्छन् । कुलदेवताको पूजामा आएका आफन्तको बृहत् जमघट हुन्छ । सामूहिक खानपिन, घरमा तयार गरिएका परम्परागत परिकार एकआपसमा साटासाट गरिनुले सद्भावमा नयाँपन थपिन्छ । प्रत्येक जाँतको आफ्नो छुट्टै विशेषता हुन्छ । स्थानीय उत्पादनलाई सौगातका रूपमा आफन्तलाई उपहार दिने गरिन्छ आल र करिया शिवालयको शिरोभाग र पदोभागको चर्चा पाइन्छ ।
धामी
जाँतमा धामीको निकै महत्वपूर्ण भूमिका रहेकोे हुन्छ ।
प्रतिक्रिया